ARGAZKI ERAKUSKETA OÑATIN ELTZIAKO TOPAGUNEAN

Argazki erakusketa hau Greziako Lesbos uhartean errefuxiatu egoeran bizi den Yousef Alshewaili argazkilari irakiarraren argazkiek osatzen dute. EREI Elkartasunerako Elkarteak antolatu du, Ilunpetan taldearekin elkarlanean, eta Bizipoza ekimenaren barruan, Lesboseko errefuxiatu kanpamendutan bizi den egoera gizarteratu, ikusarazi eta salatzeko helburuarekin.

“Nire izena Yousif da eta 21 urteko errefuxiatua naiz. Irak-etik ihesi, 2018ko otsailean iritsi nintzen Greziara eta geroztik, Lesbos nere bizileku bilakatu da. Uhartea ez da beti atsegina izan. Ez nekien zenbaterainoko zailtasunak topatuko nituen nire prozesuan zehar, ezta horrenbeste aparteko momentu biziko nituenik ere. Guzti honen artean nirekin jarraitu duena pertsonen aurpegiak izan dira, euren istorioak, bai onak eta txarrak. Kamararen atzean jartzea izan da askotan irtenbidea niretzat, baina Morian bizi izan nintzen denbora hartan alde batera utzi nuen. Ez nuen begiratu nahi, ez sufrimendua, ez mina, ez haserrea ikusi nahi ere. Egun batean aski izan zen, jendearen istorioa kontatu nahi nuen.

Polita, tristea edo itsusia dena kontatu nahi dizuet, barrutik. Ikusiko dituzuen argazki askotan jende xumea ageri da, noraezean dabiltzan arima errugabeak. Baina garrantzitsuak dira, ikusaraziak izan behar dute. Beste argazki batzuk istorio bat kontatzeko duten pertsonak dira, itxaropen edo etsipenez betetako begiak.

Gure historia kontatu nahi diot munduari, duintasuna eta indarra kendu gabe, bizitako sufrimendua, zailtasunak eta erronkak erakutsi.

Espero dut nire lana gustokoa izango duzuela."